Dialektisch vo Wörth nach Weihern und wieder zruck

Also des sag i dir glei, Vetter, eikehrn konnst bloß in Weihern, weil sunst nix dazwischen is. Wo i ofange soll? Wo ma halt in Wörth oft ofangt – hint beim Sportplatz und bei de Tennisspieler. Nacha gehst den Weg Nummero zoa, der is grea und road markiert, da Perlboch laft oba, dem gehst halt entgegn, im Winter, wenns amol an Schnee hat, nacha machas a was für d’Skifahrer und ziagn a Loipn oder wia ma sagt. Also schee is scho, des muß i scho sagn und staad, hörst bloß an Boch oder Pfögl oder de Leit, de mit dir geha und ratschen, aber sunst scho nix a! Bolsd nach Hinterzirndorf kimmst, nacha gehst über d’Straß und an de Heiser links vobei, des sigst nacha scho -  allweil der Markierung nache. Om geht der Weg nacha am Wold entlang und nach an halberten Kilometer kimmst zu oaner Abzweigung. Links gehts nach Aumboch – des is a schee – oba du gehst der grena Markierung nach und kimmst nacha obe zu oam kloane Weiha mit Fresch und Bibern –Biotop songs heit. Do gehst durch - net durch an Weiher - , an Berg affe in Wald eine und bist nacha bald in Weihern, wost eikehrn konnst, wennst mogst.

Nach da Brotzeit gehst nach da Tür nach rechts – hott sagt ma zum Ochsn – und kimmst bald in an Wold eine – d’Markierung is a blaus Viereck. Wennst am Wold om bist muast afpassen, weil jetzat geht’s ganz gach nach links. Da is auf da andern Seitn a a Markierung und de geht gwiß a wo hi, oba mia bleim auf blau und kemma wieda in an Wald eine. Nachana Zeit siegst Hornau lign und kimmst aufn Kötzinger Weg und af dem konnst bleim bist wieda in Wörth bist. Also beim, Hornauer-Eck gehst rechts, kimmst zu de Weiher ins Wellerbachtal und scho is wieda schee und staad und herst .. aber des kennma ja scho. Bei der Ziegelei kimmst wieda nach Wörth und jetzat muasst durch die ganze Stadt wieda zruck zum Auto. Bleed gell? Jetzat kanntest oans macha: